17 июля 2019
Правая вера
Богословие

"Гордость России"













Новости сайта

Получайте свежие материалы сайта себе на почту





















14 марта 2005 г.
версия для печати

Покаянный канон

Канон иеромонаха Василия (Рослякова), убиенного в Оптиной пустыни в 1993 году

ПЕСНЬ 1

Ирмос: Разcтупися пучина Чермная и ублажи стопы Израиля уничиженнаго, сомкнувшися же мглою и бурею над главою гордости Египетския; Господа прославиша во веки, яко истиннаго Судию и Избавителя.

Припев: Помилуй мя, Боже, помилуй мя.

Где обрящу начало зла моего? Окрест воззрю и содрогаюся, внутрь обращуся и возболезную, яко тьма горькая обстоит мя. О, Звездо единая, Христе Спасе мой, достигни мя лучами благодати Твоея.

Со Адамом ныне сокрушаюся: како воспою Света утеряннаго? Како возвещу Истину оставленную? Аще реку, яко не видех Господа, камни возопиют, обличающе мя. Камо пойду, презрев Тя, Спасе, Путь и Истина сый, Христе?

Слава: Не имам, Господи, витийства высокаго, не вем глаголов премудрых, но, яко и отцы наши от века, взываю Ти: помилуй мя, Боже, и спаси мя.

И ныне: Не покрыю лукавством лютых моих, но вся возвещу Тебе, Дево Чистая, обаче не смирения полон творю сия, но безстыдства потаеннаго. Ты же, кротости источниче Пречистый, омый окаянство души моея и целомудрие во мне оживи.

ПЕСНЬ 3

Ирмос: Единому дню времена уподобляя, вечности начертание показал еси, Господи, темже в храме славы Твоея лики составляются, несть свят, разве Тебе, Господи, взывающе.

Колико одежд раздеру, окаянный, и покоя достигну? Колико пепла возложу на главу срамную мою и не имам помышлений лютых? Коим вретищем покрыюся и не узрю беззаконий моих? Всуе мятуся, покаяния иский. Но Ты, Христе, рекший: без Мене не можете творити ничесоже, пройди во уды моя, словом Твоим разсецы каменную утробу мою, порази камень сердца моего и источники слез изведи.

Егда в скудости пребываю, печаль и зависть терзают мя, егда же преспеваю мало, гордостию обуреваюся неудержимою; грех алчный гонит мя, Господи. Приими сокрушение мое, Владыко, иных бо даров и жертв не имам.

Слава: Откуду прииму слезы, аще не от Тебе, Боже? Камо гряду в день печали, аще не во храм Твой, Владыко? Где обрящу утешение, аще не во словесех Твоих, Святе? Не отрини мене, Господи, и ныне помяни мя.

И ныне: Призри на мя, прах и пепел, Пречистая Владычице, и вся скверная моя попали, да не обешу на выю мою жернов осельский, но прах согрешений моих принеси Христу Богу моему, и возметет от лица преклоненнаго моего.

СЕДАЛЕН

Тьма обдержит мя, оставих Тя, Свете истинный, стою во тьме и хладе малодушия. Страха ради творю огнь мудрования моего и не огреет мя, нощи смертныя ужасаюся. Возстани рано, Господи, Солнце мое, и оживи мя теплотою Духа Твоего.

Слава: У Тебе, Владыко, прошу благодати, но тайную надежду полагаю в крепости моей; величаю и благодарю Тя, но славы не лишаю самолюбивыя души моея. Не презри, Господи, покаяния моего и помилуй мя.

И ныне: Со всякою скорбию, великою и малою, с обидами тайными и печалию горькою прибегаю к Тебе, Мати Божия, яко чадо, от злых обидимое, вся приношу Тебе, Дево Чистая, чая утешения и Матерния милости.

ПЕСНЬ 4

Ирмос: Мир из небытия воззвавый и персть земную сыном Света соделавый, возведи, Господи, в радость душу мою и утверди во истине Твоей непоколеблемо.

К Тебе иду, Господи, и утаити замышляю, яко же Анания и Сапфира, часть некую души моея на дела постыдная. Призри на немощь мою и умертви тайная моя, и Сам яви мя неосужденна пред Тобою.

Не приемлет душа моя утешения: днем лицемерие мое наставляет мя, нощию же нечестие сердца моего предстоит мне; отобоюду печаль и поношение, несть мне прибежища; един токмо плач утверждение и утешение мое.

Слава: Отче, возстави мя, аз бо пред грехом пресмыкаюся рабски; Сыне, изведи мя от места студнаго жития моего; Святе, освяти нощь странствования моего; Троице непостижимая, да гряду к Тебе покаянием непоколебимым.

И ныне: Богородице Милостивая, горькая жизни сея услади слезами покаяния, окамененная мира сего сокрушением сердечным умягчи. Вся бо можеши, молением неусыпающим одесную Христа Бога предстоящи.

ПЕСНЬ 5

Ирмос: Плачевною нощию бездне небесней удивихся, день истлевший пред собою видя, достигнув же зари и начала солнечнаго, паки удивихся неудержимо блистанию пророчествующему.

Яко Савл, неистовствую на Тя, Боже, ревностно гоню благодать Твою от себе, но Ты Сам, Владыко, явися сердцу моему и ослепи оное светом любве Твоея, и возглашу аз, окаянный: что сотворю, Господи?

Обличил мя еси, Господи, и преклонихся пред Тобою, стыдом покрыстася очи мои, да не узрит и нощь греха моего; токмо Тебе, Боже, печаль моя. Не остави мене, смятеннаго, посети и спаси мя.

Слава: Не гладом гладна душа моя, не жаждею жаждет сердце мое, но о глаголех Твоих, Христе, стражду, о истине Твоей алчу. Призри на немощь мою, Господи, и подаждь манну словес Твоих.

И ныне: Свещею неугасимою, слезы теплыя на землю искапающи, предстоиши, Богородице Пресвятая, пред Царем Небесным, темже и мне света и тепла Твоего даруй на дерзостное сердце мое.

ПЕСНЬ 6

Ирмос: Повержен на ложе слезное, яко на дно морское, како возстати мне, смертному, от места клеветы и презрения? Господи мой, Боже мой, воскреси мя, погибающаго.

Внегда искренний мой поношаше мя, к Тебе, Господи, душа моя; аще убо душа моя обетшает, уста призовут Владыку моего. Но камо, Господи, пойду, аще речеши: не вем тя? Земля не приимет мя, небо не покрыет мя, не отрини мене, Боже, от лица Твоего.

Твоя от Твоих приношу Ти, Спасе, и величаюся; тщуся, яко Симон волхв, Духа Святаго получити за мзду молитв и дел моих. Прости мя, Господи, и не помяни нечестия моего.

Слава: Уста исповедуют Тя, Господи, тело уготовляется на подвиги и страдания, душа же безмолвствует и готовит час отречения моего; Господи, сокруши жестокое сердце мое и от сна нечувствия возстави мя.

И ныне: Сокрушистася колена моя от нощи печали и забвения, но Ты не забуди мене, Мати Божия, и возстави мя, унывающаго.

КОНДАК

При брезе стану, Господи, и восплачу, яко зрю Тя по иную страну вод непроходимых. Обрати ко мне очи Твои, Спасе мой, и помилуй мя.

ИН КОНДАК

Глас Твой слышу, Господи, глас хлада тонка, и не вем, откуду приходит и камо идет. Отверзи, Христе Спасе, слух сердца моего и настави, и спаси мя.

ИКОС

Померче во мне Солнце Правды, и прииде на мя хлад земный, греюся огнем страстей моих, во дворех чуждих обретаюся, окаянный. Взыди, Господи, на небо сердца моего и день спасения мне возвести.

ПЕСНЬ 7

Ирмос: Вавилонскую пещь огненную, яко часть малую пламене беззакония людскаго, отроцы невредимо проидоша, спасения песнь воспевающе: Боже отец наших, благословен еси.

Аще оставлю Тя, Господи, Ты не остави мене до конца, потерпи безумства и беззакония моя, покрый срамоту и нечестие мое. Егда же в день печали призову Тя, прости мене и не помяни непостоянства и двоедушия моего.

Стыждуся просити Тебе, Господи, темже не имам словес к Тебе, окаянный, токмо руце простираю и сердце, милости прошу и хлеба насущнаго, яко нищий, отверженный и презренный.

Тебе, Господи, ищу и не обретаю; яко слепец, ищу Тебе и поводыря не имам; при дороге сижу и ожидаю, внегда мимоидеши, и услышиши моления моя.

Слава: Глаголеши, Господи: стучите, и отверзется вам; но скорбь, Владыко, связа руце мои, исторже мужество из души моея; при дверех сижу, безмолвный. Отверзи ми, Господи, и призри на мя, яко на разслабленнаго иногда.

И ныне: Почто сиротствую, Матерь имея мира Владычицу? Почто смущаюся во странствиих, дом наследовав небесный? Пресвятая Богородице, Мати Господа нашего, доведи мя до горняго отечествия моего.

ПЕСНЬ 8

Ирмос: Не ужаснися, душе моя, не устрашися, сердце мое, искушения огненнаго, во очищение посылаемаго Господом Милосердым. Егоже страсти помяните, Воскресение воспойте и превозносите Его во вся веки.

Верности слово вручаю Тебе, Господи, но при первом страсе отрицаюся; видя же Тя на поругание ведома и, обращься, зряща мене, поминаю, студный, клятвы моя, гряду вон и плачуся горько.

И плачевный Иуда любляше Иисуса, обаче корысти ради; аз же, немощный, таяжде творю: силы Божественныя любве не приемлю, изнемогаю от нощи тщеславия моего. Спаси мя, Господи, да не впаду в бездну предательства и погибели вечныя.

Слава: Дары исцелений от Бога приим и людем расточая, славою обогатися Иуда; приношения содержа и милостыню подавая, благодареньми услаждашеся; аз же, треокаянный, тщеславия богатство скопив, страшуся единожды Бога предати. Спаси мя, Господи, да воздам Тебе Единому славу и благодарение.

И ныне: Скудно есть хваление мое Твоего, Владычице, милосердия, немощно покаяние мое о бездне грехов моих; отсутствую во благодарении, безуствую и в покаянии. Не остави мене, смятеннаго, Мати Божия, и спаси мя.

ПЕСНЬ 9

Ирмос: Усыновление мое чудное Материю Господнею дерзаю воспевати, но страшуся и трепещу сего, яко при Кресте бывшаго. Предстани мне, Мати, в позорищи и смерти и спаси мя сиянием лика Твоего Пречистаго.

Не отвещаеши мне ничесоже, Господи, егда вослед вопию Тебе: помози ми, душа моя жестоко печалуется. Обратися же, Спасе мой, яко не понесу оставления сего, и помилуй мя.

Вем, Господи, вем, яко биеши всякаго сына, егоже приемлеши, но ропщу, егда зрю наказуемых чад Твоих. Прости мя, Господи, и терпение с благодарением даруй.

Слава: Разумом постигаю, яко славу готовиши плачущим и уничиженным, но душа моя не утешается ныне воздаянием грядущим; скорбь объемлет мя, егда зрю поношения на искренняя моя. Помилуй мя, Господи, и молитися научи за враги неоскудевающия.

И ныне: Гнева огнь неугасимый сожигает мя, гордыни червь неусыпаяй снедает сердце мое. Спаси мя, Пресвятая Богородице, от мук адовых, достигших до души моея.

СВЕТИЛЕН

Свете мой, Христе Спасе, нощь жития моего, идеже и солнце не просвещает мя, озари блистанием Божества Твоего и спаси мя.

МОЛИТВА

Господи Иисусе Христе, Ты еси Хлеб животный, и приходяй к Тебе не будет алкати, и веруяй в Тя не будет жаждати вовек. Господи, Ты еси Хлеб живый, сшедый с небесе, и ядый Хлеб сей не умрет и будет жити во веки; Господи, Хлеб сей есть Плоть Твоя, юже Ты дал еси за жизнь мира, темже и рекл еси: ядый Мою Плоть и пияй Мою Кровь имать живот вечный, и Аз воскрешу его в последний день. Тако и днесь грядем к Тебе по словеси Твоему. И ныне, испытуя нас, глаголеши: не хощете ли и вы отыти? Мы же, яко Петр иногда, зовем Ти: Господи! К кому нам ити? Ты имаши глаголы жизни вечныя, Ты еси Христос, Сын Бога Живаго, Ты еси Альфа и Омега, начало и конец, Ты еси Бог, Царь и Господь, и Твою державу и милосердие славим ныне и присно и во веки веков. Аминь.





Оставить свой отзыв о прочитанном


Ваше мнение об этом материале:

— Ваше имя
— Ваш email
— Тема отзыва

Ваш отзыв (заполняется обязательно):

Введите текст показанный на картинке:

Правая.ru


Получайте свежие материалы сайта себе на почту
Rambler's Top100 Яндекс цитирования
Использование материалов допустимо только с согласия авторов pravaya@yandex.ru, с обязательной гиперссылкой на сайт Правая.ru.
 © Правая.ru, 2004–2019